ВКЛ / ВЫКЛ: ИЗОБРАЖЕНИЯ: ШРИФТ: A A A ФОН: Ц Ц Ц Ц
Муниципальное бюджетное учреждение дополнительного образования
"Улаганская детская школа искусств имени Алексея Григорьевича Калкина"

Муниципальное бюджетное учреждение дополнительного образования

"Улаганская детская школа искусств имени Алексея Григорьевича Калкина"
МЕНЮ

«Јаш-Канаттыҥ» једимдери

Бистиҥ Улаган аймакта балдардыҥ јайаандык школында кӧп јайалталу балдар јӱрет. Алтай ойноткылар ла кожоҥдоорына балдарды Алан Викторович ла Айана Михайловна Темеевтер балдарды ӱредет, олор ады јарлу «Јаш-Канат» деп образцовый ӧмӧликти 2005 јылдаҥ ала эрчимдӱ башкарат. Бу јылдардыҥ туркунына «Јаш-Канат» ӧмӧликтеҥ кӧп балдар ӱренип чыккан, олор эмди бойлорыда јаан улустар, олор ортодо кӱӱле јӱрӱмин колбоп,оноҥ ары бийик ӱредӱ алатан колледж ле университетты ӱренип божодоло, бойлоры да балдарды кожоҥдоп, алтай ойноткыларла ойноорына ӱреткилейт.

 

«Јаш-Канат» ӧмӧлик ӧткӧн јылдыҥ јаҥар айыныҥ баштапкы кӱндеринде Бийск калада албатылык ортодо конкурста  эрчимдӱ турушкан. Бу јаан кӱӱлик маргаан ӱч кӱнниҥ туркунына ӧткӧн. «Народный вокал» деп номинацияда «Јаш-Канат» 2-чи јерди ала сокты, бистиҥ јиит јеҥӱчилерис ол: Токоеков Влад, Тельденов Адар, Тушташев Борис, Куюкова Айлана ла Темеева Айдыҥ-Ай. Алтай Республикадаҥ кӧп балдар барып турушкан, олор ортодо Усть-Канныҥ «Алтын-Кӱӱ» деп образцовый ансамбль база турушты.

  Бу балдар ортодо Байтушкин Алан алтай ойноткыларла  ойноп, 1-кы јерге чыккан, бу «соло» деп номинацияда 700 кӧп туружаачы болгон, је гала-концертке 10 ло номер талдалып кӧргӱзилген болгон, бу тоодо Аланныҥ номеры кожо болды. Огош балдардыҥ группазында «Эстрадный вокал» деп номинацияда 7 јашту Темеева Айдыҥ-Ай 2-чи јер алган. Айдыҥ-Ай кӧрӧӧчилерди «Бабушка» ла «Солоҥы» деп кожоҥдорыла сӱӱндирди.

«Јаш-Канат» ӧмӧликтиҥ јеҥӱчилдерин јай ӧйинде Крымга келзин деп кычырган,  олор эмди ого јетире белетенип, анда талдама лауреаттарга учурлалган конкурста туражар.

Бу јаан јол-јорыкка барып, эрчимдӱ туружып јанганына, акча-манатла болужын јетирген культура бӧлӱгиниҥ јаанына Солунай Олеговна Санаа ла балдардыҥ јайаандыгыныҥ јаанына Любовь Андреевна Натовага турушкан балдардыҥ эне-адалары, Алан Викторович ле Айана Михайловна Темеевтер јаан быйанын айдат.

Онойдо ок бу ла ӧйлӧрдӧ Горно-Алтайск калада «Курултай сказителей» ӧткӧн, «Јаш-Канат» ӧмӧлик 2-чи јер алган. Мында эки огош кайчы турушты: Кобенов Радий ле Табышкин Алан. Радий 3-чи јер алган, Алан специальный сыйла кайралдатып, топшуур сыйлаткан.

 

Ӧткӧн 2018 јылда Алтай Республикадыныҥ јааныныҥ А.В. Бердниковтыҥ гран-при сыйыла кӧдӱриҥилӱ айалгада кӧп јайалталу јииттер кайралдаткан. «Јаш-Канат» ӧмӧлик мында да јаан ајаруда болгон, анайып сый алагн јайалталу јииттер ол: Кобенова Айдана, Машкаков Виктор, Олчонова Влада ле Толтушев Аткыр. Је Аткыр бу кайралда турыжып болбогон, нениҥ учун дезе ол тургуза ӧйдӧ черӱчил молјузын бӱдӱрет.

«Бу келген јаҥы 2019 јылга бис ӧмӧлигисле кожо јаан амадулар темдектейдис: «Јаш-Канат» ӧмӧликтиҥ ойын-концерттин белетеп кӧргӱзерге ле јайыла болчомдорло кожо соктырган клиптарысты белетеп чыгарарга. Алтай Республикада огош болчомдордыҥ клипы алтай тилле чыкпаган деп айтсам јастыра болбос.

Бистиҥ белетеген клибыста алтай тилле согылган алты кожоҥ болор. Бу клипты кӧрӱп, балдар алтай тилин ундыбазын, оноҥ ары јараш, кеен тилин чеберлеп, улалтып апарзын деп амадайдыс» деп, Айана Михайловна јартады.

 

Керек дезе, бистиҥ аймакта ады-јарлу кайчылар, кожоҥчылар да кӧп, је кажыла баштапкы алтамдарда кажы ла кижидиҥ бойыныҥ баштапкы таскадып ӱреткен кижизи бар. Ол байла кижиге эҥ ле баалу ла учурлу. Кажы ла таскадаачыгабалдардыҥ јеҥӱлери ле једимдери, ого јаан кайрал болот. Мынаҥ ары бу ӧмӧликке бийик једимдер, јаан амадулар кӱӱнзери артат.

 

 

Информация

© 2021. .